सुनसरीको बराहक्षेत्र नगरपालिका–९ स्थित सप्तकोशीको किनारमा ३ जना युवतीमाथि निर्घात कुटपिट भएको भिडियो सामाजिक सन्जालमा सार्वजनिक भएको छ। ५ जना युवती मिलेर ३ जनालाई निर्घात कुटपिट गरेका हुन। प्रहरीले घटनामा संलग्न एक जना बराह क्षेत्र १० प्रकाशपुरकी १९ वर्षीया प्रीति लिम्बुलाई पक्राउ गरेको छ ।
अन्य ४ जना बराह क्षेत्र ९ बस्ने १९ वर्षीया सन्जिता राई, १९ वर्षीया निहाङ राई, बराह क्षेत्र ८ सैनिक टोल बस्ने १८ वर्षीया दुर्गा राई र बिनिता उरावँको खोजी भइरहेको प्रहरीले जनाएको छ । पीडित पक्षका युवतीहरुले उजुरी दिएपछी प्रहरीले पक्राउ गरी कार्वाही अगाडि बढाएको छ। असार २९ मा मादक पदार्थ सेवन गरेपछि दुई समूहको बिचमा भनाभन हुँदा झगडा भएको प्रहरीको भनाइ छ।